نصائح وتحفيز

كيف مذاكرة مادة اللغة العربية لشهادة الثانوية العامة

في المقال ده هنحاول مع بعض نناقش طريقة مذاكرة اللغة العربية للصف الثالث الثانوي وزي ما احنا عارفين العربي عامل عقدة ومشكلة كبيرة لناس كتيرة جداً بسبب إنه طويل ومليان حفظ كتير ومعظم الناس بتزهق بسرعة من مذاكرته…

العربي ي جماعة مش صعب زي مانتو فاكرين ولا مذاكرته صعبة زي مانتو فاكرين انتو بس أللي بتحاولوا تقنعوا نفسكم بكدة عشان كارهينه طب ماتيجو تجربوا تحبوه كدة وتذاكروه!! انتو كارهينه عشان ركنتوه من اول السنة ومافتحتهوش وهو مادة تقيلة فطبيعي اتراكم عليكم حاجات كتيرة فأما جيتوا تفتحوه لقيتوا نفسكم تايهين ومش عارفين تذاكروه هو دة السب..

العربي عندنا ٦ فروع وكل فرع ليه طريقته طبعاً ف المذاكرة فهنبتدي بالقصة مثلا.

ازاي أذاكر قصة طه حسين لغة عربية شهادة الثانوية العامة

#القصة: أنت ممكن تفهم الاحداث ركز ف الشرح كويس جداً مع المستر بيتاعك وروح أقرأ الفصل أللي خدته وأبدأ حل الواجب وأسئلة ع الفصل دة. طبعاً عارفة السؤال أللي بيدور ف دماغكم يعني ماحفظش أسئلة ادخل احل كدة علطول؟!

#أولا: ماتحاولش تقنعني انك هتحفظ أسئلة ال٢٢ فصل بالمقدمة يعتبروا ٢٣ فصل صعب جداً حفظ الأسئلة دي +كمان ان دة تضييع للوقت ع الفاضي انما انت اما تفهم وتقرأ الفصل وتحل بفهمك وتعبر بطريقتك هيكون أفضل نفترض جالك سؤال ونسيت اجابته هتعمل ايه بقي هتفضل تفكر فيه؟! انما لو فاهم كويس الأحداث وقاري الفصول هتعرف تجاوب عليه من فهمك فحاولوا تدربوا نفسكم…

أزاي أذاكر دروس القراءة الصف الثالث الثانوي

#القراءة: افهم الدرس كويس جداً وركز ف الشرح واعرف هو بيتكلم عن ايه وأقرأ الدرس كويس بتركيز وتعرف بيتكلم عن ايه وتحل عليه والمعاني احفظ الكلمات الغريبة عليك وأللي تلاقي نفسك عارفها خلاص ف ناس طبعاً هتقولي لا بس انا بجيب المعاني من فهمي من القطعة مفيش مشكلة ودي حاجة كويسة بس نحفظ المعاني احتياطي ربما معني غريب يجيلي ماعرفوش واهم حاجة الحل .

أزاي أذاكر دروس النحو لشهادة الثانوية العامة

#النحو : أما تيجي تذاكر النحو ابعد عن دماغك انه صعب وانك مش كويس فيه وانك لو ذاكرته مش هتفهمه ومش هتعرف تحل ابعد كل الأفكار السلبية أللي بتجيلك دي عن دماغك خالص وحاول تقنع نفسك انه سهل وانك تقدر وانك هتفهمه وابعد عن دماغك خالص انه صعب عشان المخ بيستقبل المعلومات أللي انت بتديهاله فأنت اما تقنع نفسك بكدة يبقي عمرك ماهتتقدم فيه وهيفضل عقدة انما اما تقنع نفسك انه سهل المخ بيستقبل المعلومات كدة وبيبقي سهل وبيقدر المخ ساعتها يستوعب.

  • #أولا : ركز كويس جداً ف شرح المستر بتاعك ف الحصة ولازم بيخليك تحل معاه ف الحصة ولو غلطت عادي ولا يهمك ما كلنا بنغلط بس تتعلم من غلطك دة
  • #ثانياً: امسك الدرس اقراه كويس بتركيز وفهم كويس وافهم القاعدة واعرف بتقول ايه واحفظها عشان مش هتعرف تحل غير اما تكون عارفها وحاول تعمل لنفسك ملخص لكل درس كدة تخلصه وانا عاملة ورق اعرابات ثابتة ودروس وكدة وهبقي أنزلهم ان شاء الله.
  • #ثالثاً : اما تقرأ الدرس وتفهمه لازم تحل عليه أهم حاجة الحل وخلي القاعدة قدامك والكتاب او الملزمة أللي بتذاكر منها قدامك عادي مش عيب لحد ماهتلاقي الدرس بقي تمام معاك لو سؤال وقف معاك حاول فيه ماعرفتوش علم عليه وأسأل فيه المستر بتاعك خليه يفهمهولك مش عيب اما تسأل دة حقك
  • #رابعاً : كل درس تاخده ذاكره كويس وحل عليه أسئلته وحل الواجب وطبعاً أسئلة الملزمة مش كفاية لو معاك خارجي مثلا كتاب الامتحان عامل أسئلة كتيرة ع كل درس وجايبلك كمان أسئلة الثانوية العامة أللي جت بالسنين. يبقي اهم حاجة الحل تمام..!
  • #خامساً : زي ماقولتلك اهم حاجة ف النحو الحل الكتير ممكن بقي تبدأ تحل قطع وحل القطع حلو جداً وتبتدي تحل قطع من دلوقتي بس خد بالك📢……نصيحة مني ليك….📢

أما تيجي تحل نحو ماتحلش كتير من أول مرة لو مستواك ضعيف ف النحو يعني حل مثلا اول مرة قطعة او قطعتين مش أكتر. عارفة السؤال أللي بيدور ف دماغكم طب أنتِ مش لسة قايلة اهم حاجة الحل واني لازم أحل كتير ازاي بقي دلوقتي بتقوليلي أوعي تحل كتير من اول مرة؟!!🤔
هقولك وهجاوب عليك حالاً اهو.

أنا أما قولتلك اهم حاجة الحل ولازم تحل كتير كان قصدي ع درس واحد ومذاكرتك ليه فلازم تثبت أللي انت ذاكرته دة طبعاً وهتلاقي الأسئلة بتكرر وأفكار مختلفة وكدة

انما انا بقولك ماتحلش كتير من اول مرة بتكلم عن القطع الكاملة ودي طبعاً بتختلف انها بتبقي جيبالك كل الدروس أللي عندك ولازم تركز وانت بتحلها فهقولك انا ليه قولتلك ماتحلش كتير من اول مرة.
اول حاجة بص لازم تحل قطعة او قطعتين بس اكتر من كدة لا لو أنت مستواك ضعيف ف النحو هنفترض مثلاً انك حليت قطعة تعمل ايه بقي؟!🤔

دي طريقة عشان تبقي كويس ف النحو تمام…😍 حليت القطعة اهو تروح بقي للمستر بتاعك تراجعها معاه كلها وتشوف غلطت ف ايه هيطلع مثلاً عندك ٣ غلطات إعراب عادي ولا يهمك أوعي تيأس اتعلم من غلطك وكمل حل زود بقي عدد حل القطع تدريجياً حليت قطعة خلاص خليهم بقي قطعتين وروح راجعهم مع المستر برضو هتلاقي غلطتين عادي ولا يهمك روح كمل حل وأوعي تيأس وزود وخليهم ٣قطع وهتلاقي غلطة واحدة وأفضل كدة لحد ماهتلاقي نفسك مابقتش تغلط وبقيت تحل القطعة كلها صح من غير ماتغلط ويبقي عندك ولا غلطة لأن القواعد ثابتة وهي هي وبتكرر واستمر ع النظام دة واهم حاجة لازم تراجع مع المستر بتاعك الحل بتاعك كله أللي حليته وأللي مش فاهمه خليه يشرحهولك دة حقك ودة واجبه.

وعرفت بقي دلوقتي ليه قولتلك ف الأول أوعي تحل كتير من أول مرة وخصوصاً لو مستواك ضعيف عشان لو حليت كتير هتروح تراجع هتلاقي ف كل قطعة بتاع ٣او٤ غلطات هتكره النحو وهتتقفل منه ومش هتذاكره وهتقنع نفسك انك مش كويس فيه وعمرك ماهتبقي كويس فيه انما الطريقة أللي قولتهالك دي هتديك ثقة ف نفسك انك تقدر. وأوعي تنسي أهم حاجة الحل دة هيساعدك كتير وهيديك ثقة ف نفسك

وبكدة تبقي عقدة النحو اتحلت ان شاء الله والطريقة دي صدقني مستواك هيعلي ف النحو وهتبقي كويس فيه جداً بس جرب أنت الطريقة دي وان شاء الله تجيب فايدة معاك.

أزاي أذاكر بلاغة الصف الثالث الثانوي

#البلاغة : فرع مهم من فروع العربي ولازم نهتم بيه جداً
اهم حاجة ابعد الأفكار السلبية كلها عن دماغك زي ماقولتلك قبل كدة ف البوست دة والبوستين أللي قبله.

البلاغة عشان تعرف تحلها لازم تقرأ الأبيات بتركيز وتعرف بتتكلم عن ايه وتعرف المعاني وتبقي عارف كمان قوانين البلاغة أهم حاجة. طبيعي أول أما تيجي تحل مش هتبقي فاهم حاجة أوعي تقفش وتسيب الكتاب وتقوم دة أكبر خطأ لا أعند مع نفسك وقول لا هفهمها لازم افهمها وحاول وهتلاقي نفسك فهمت وابتدي حل بقي وأهم حاجةالحل وخلي قوانين البلاغة قدامك عادي مش عيب واعمل نفس الطريقة أللي قولتلك عليها ف النحو اعملها ف البلاغة كمان..

النصائح مقدمة من الطالبة /صباح وحيد.

لطلاب الثانوية العامة

اظهر المزيد

مُحمد علي

مُحمد علي : طالب بكلية الطب ومؤسس إي بوك التعليمي رقم الهاتف :- +79997892097

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى